Ողջույն, ես Զառան եմ, մասնագիտությամբ լեզվաբան, գրականագետ, ուսուցիչ: Ավարտել եմ ԵՊՀ Ռոմանագերմանական բանասիրության ֆակուլտետը: Սիրում եմ կյանքը և փորձում եմ ցանկացած իրավիճակում տեսնել դրականը, ինչը շատ է օգնում ինձ կյանքում: Համալսարանն ավարտելիս երկամսյա վերապատրաստում անցանք հանրակրթական դպրոցներից մեկում, որտեղ էլ սիրահարվեցի ուսուցչի աշխատանքին: Ինձ հաջողվել էր դասին ներգրավել բոլոր աշակերտներին, բոլորը դասին ներկայանում էին պատրաստված, ինչն ինձ անչափ ոգևորում էր: Սակայն հանրակրթական դպրոցում տիրող մթնոլորտը ստիպեց ինձ կարծել, թե ուսուցչի աշխատանքը իմ էության հետ անհամատեղելի է, ազատության և արդարության ձգտումը, դաստիարակության և կրթության մասին իմ պատկերացումները չէին համապատասխանում դպրոցի պատկերացումներին: Տարիներ անց, երբ արդեն իմ երեխաները պիտի հաճախեին դպրոց, երկար և մանրամասն ուսունասիրելուց հետո վստահաբար ընտրեցի Մխիթար Սեբաստացի կրթահամալիրը, որի մոտեցումները և սկզբունքները առավել մոտ էին իմ պատկերացումներին, և հենց այդ պատճառով էլ մեծ ցանկություն առաջացավ աշխատել կրթահամալիրում:
